Aussie patay sa boring

CEBU, Philippines - PATAY na nga nahidangat sa tambalanan ang usa ka Australian national nga gituohang gituok sa usa ka gidudahang boring sulod sa apartment sa langyaw  sa dalan Humay-Humay sa barangay Pajo, dakbayan sa Lapu-Lapu alas- 8 pasado ang takna sa miaging gabii.

Ang suspetsado nga nadakpan sa kapolisan ug temporaryo karon nga gibalhog sa sulod sa ilang detention cell.

Si SPO1  Allan Pantaleon sa Homicide Section sa kapolisan sa Lapu-Lapu City Police Office (LLCP) miila sa namatay nga mao si Rodny Kim Chambers, 53, temporaryong nagpuyo sa usa ka apartment nga nahimutang sa maong dapit.

Ang suspetsado nga gikatahapang babayeng mubo og lupad mao ang 32- anyos nga ang pangalan gipugngan sa kapolisan ug lumad nga taga Davao del Sur apan temporaryong nagpuyo sa dalan Maximo Patalingjug sa barangay Pajo sa mao gihapong siyudad.  Matud pa ni Pantaleon nga sa ilang pagsukitsukit sa suspetsado mialegar  kini nga alas-10 pa sa buntag niadtong Sabado gidapit siya sa maong langyaw nga mangadto sa apartment niini.

Giingong nagkasabot sila nga bayran siya niini og P3,000 aron makighilawas maong misanong ang suspek.

Matud pa ni Pantaleon nga miangkon ang suspek nga nakaupat ka ‘rounds’ ang biktima hangtud pagkagabii apan pagkahuman niini, gikatahong giabog sa maong langyaw ang suspek ug wala bayari.

Kini maoy hinungdan nga nagdumili sa pagpauli ang babaye apan gitukmod siya sa maong langyaw pagawas sa balay maong gipatiran kini sa suspek diha sa bugan maong natumba apan naparok ang ulo niini sa pultahan ug nawad-a’g panimuot.

Matud pa ni Pantaleon ang babaye nangangkon nga sa iyang kakuyaw iyahang gitabang ang langyaw apan tungod kay nadungog man sa mga silingan ang komosyon ug abli ang pultahan sa apartment dunay nakakita nga giyak-an sa suspek ang maong langyaw nga wa nay panimuot.

Si Pantaleon nagkanayon nga sa ilang pakisusi sa background sa maong langyaw, nahibaw-an nga hubakon kini ug duna kini gi-maintain nga tambal. Ilaha karong girekomendar nga ipa-awtopsiya ang patay’ng lawas aron pagsusi kung unsay hinungdan sa kamatayon niini. (BANAT NEWS)