Lalaki giluba sa lalaking bag-ong kapuyo sa iyang kanhi kapuyo

CEBU, Philippines - Patay ang usa ka lalaki nga gidunggab sa tawo nga gisugo sa kanhi hinigugma niini nga gubaon ang iyang balay sa sitio Mawmawan, barangay Babag 2 sa dakbayan sa Sugbo sa alas 11:32 sa buntag.

Ang biktima naila nga si Danilo Jacaban, 44, may live-in partner, manghimoay og furniture ug molupyo sa sitio Mawmawan, barangay Babag 2 sa dakbayan sa Sugbo.

Ang suspetsado naila lang sa ngalan nga Lito kinsa padayon pang gipangita karon sa kapolisan.

Subay sa  imbestigasyon sa Homicide Section sa Cebu City Police Office nga ang live-in partner sa biktima nga si Rubelita Dayanan, didto sa sulod sa balay samtang ang suspetsado nagbarog gawas sa ilang balay ug naglalis sa biktima.

Matud pa nga milakaw ra pod dayon ang suspetsado apan mibalik nga may kuyog nga babaye balik sa balay sa biktima.

Nasuta nga ang maong babaye mao si Ermita Sabal, gikataho nga kanhi hinigugma sa biktima.

Dihang nag-abot ang tulo mitumaw ang panaglalis apan ang suspek armado na diay og kutsilyo ug kalit lang gidunggab ang biktima sa makadaghang higayon.

Daling gidala sa Cebu Doctors Hospital ang biktima apan gideklarar kini nga dead on arrival.

Nasuta sa imbestigasyon sa kapolisan nga sa wala pa mahitabo ang maong krimen, ang suspetsado gisugo ni Sabal sa pagpaguba sa atop sa balay sa biktima kay siya ang nanag-iya sa maong pwesto. (BANAT NEWS)