Cayetano kang Apostol: Kurapsyon maoy tutuki

CEBU, Philippines - "Graft and corruption na lang ang asikasuhin nila," matud pa ni Senate Majority floor leader, Senator Alan Peter Cayetano sa dihang gipangutana siya sa iyang habig kabahin sa komentaryo sa Office of the Ombudsman-Visayas nga illegal ang "Piso Ko, Hospital ko" nga kampanya sa Cebu City government. "Let us not focus on the process but let us focus on what we can do to help build this state of the art hospital," matud pa ni Cayetano kinsa bag-o lang nibisita sa Sugbo. Ang  "Piso mo, Hospital ko" nga kampanya nagtinguha pagtigom og P1.5 billion aron sa pagtukod sa bag-ong  Cebu City Medical Center, human gi-deklarar nga unfit for occupancy tungod sa pagkaguba dihang miigo ang 7.2 magnitude nga linog niadtong Oktubre  15, 2013.

Sa dihang gilusad kini  niadtong Oktubre 21, 2013 nihulog og P100,000 ngadto sa  donation bottle si Cayetano.

"Donations are intended for one purpose, and that is for the construction of a new CCMC. Marami namang mga fund-raising campaign ang simbahan, mga private groups and they are not required to have a permit," matud pa ni   Cayetano.

Miabot na og P7.3 milyones natigom sa siyudad sa Sugbo sa Oktubre 31 pa lang.  Aron madungagan pa gyud ang maong pundo, ang siyudad sa Taguig, kinsa asawa ni Cayetano ang mayor, mopahigayon og usa ka fun run sa sunod tuig ug ang matigom niini padulong sa maong tinguha. (Mitchelle Palaubsanon/EIM)

Tindahan gitulis,  P1.2M nasakiyo

Usa ka tindahan ang gitulis sa tulo ka mga wala pa mailhing mga lalaki nga misakiyo sa P1.2 milyones nga salapi sa Hibbard Avenue, barangay Bantayan sa dakbayan sa Dumaguete sa alas 8:45 sa miaging gabii.

Matud pa sa gipadalang impormasyon ni Supt. Renato Dugan, public information officer sa Police Regional Office-7 dinhi sa Banat News nga ang gitulis mao ang Costner Trading Corp. nga nahimutang sa maong lugar.

Ang mga tawo diha sa tindahan nga naglakip sa mga kawani naila nga sila si Emelito Guarin, Mario Manriqui, Joel Romarate, Diomel Mico Agan, Jimdady Adanza, Ronsil Tabada, Ian Balocos ug si Marilou Sun.Matud pa nga ang mga tulisan misulod sa gate sa maong tindahan ug mikuha sa P1.2 milyones nga salapi nga kinitaan sa maong tindahan.

Lakip sa gikuha sa mga suspetsado ang laptop, pitaka ug mga celfone sa mga biktima ug dayong sibat niini. Padayon pa ang imbestigasyon sa kapolisan sa maong hitabo. (BANAT NEWS)