Presyo sa bugas misaka

CEBU, Philippines -  Ang pagsaka sa presyo  sa bugas  nga  P1 ngadto sa P2 matag  kilo  temporaryo  lamang. Mao  kini  panglantaw ni Lucy Morales, tigpamaba  sa  National Food Authority (NFA)7.

Miingon  si  Morales  nga  mokunhod  kini  sa sunod  buwan kay  ting-ani  na  sa humay.

Gani  miingon  siya  nga kun  moagwanta  lamang  ang  mga  pumapalit  sa bugas  sa NFA, may tag P27 man  ang  kilo  sa ilang  mga  bugas.

Ang well milled  rice  tag P32 matag  kilo  nga  mao  kini  ang  dali kaayong  mahalin  karon  nga  kuninitan  sa mga  tindahan.

Pero  daghang mireklamo  kay maglisud  na  sila  pagpangita niining  bugasa  kay  tagoan  sa mga  negosyante  ug  sagulan  sa commercial rice  busa  dili  na  NFA.

Gikan sa P32, mireklamo  na  ang  daghang  pumapalit  kay  anaa  nay  tag P47 ngadto  sa P50 matag  kilo sa bugas.

Si Nilda Monteron, 57 anyos, minyo nga taga barangay Paknaan sa dakbayan sa Mandaue nga nahinabi sa Banat News  nagkanayon  nga  hilabihan  ka  taas  ang  presyo  sa bugas  karon  itandi  sa miaging  tuig.

Gani  ang  baligya  niya  karon  sa matag  takos  sa kan-on   gihimo  niyang  P7 gikan sa P6 kaniadto.

Kini  tungod  kay  dili na  siya  makakita  og  bugas  nga  NFA nga  unta  maoy  labing  barato sa  tanang  bugas.

Ang NFA  nga  kaniadto para  sa mga  kabus ,  sa pagkakaron para  na  sa  mga  kuwartahan  matud  pa  niya. (/WC)  (BANAT NEWS)