One Stop Shop diha sa mga sam-ang buksan karong adlawa

CEBU, Philippines - Libuton sa mga opisyales sa siyudad sa Sugbo pinangulohan ni Mayor Michael Rama ang mga sam-ang sa siyudad sa Sugbo alang sa inspeksyon sa preparasyon sa Adlaw sa mga Santos ug Minatay sugod ugma.

Nagkanayon si Rama nga iyaha usab nga sutaon kung napahimutang na ba ang One-Stop-shop nga gikatakdang magsugod na karong adlawa sa tanang mga sam-ang nga maoy pahimutangan sa mga polis, medical team, tanod, traffic enforcers ug uban pang volunteers nga maduolan sa nagkinahanglan og tabang.

Kahinumduman nga gitigom sa mayor sa miaging adlaw diha sa iyang opisina ang mga kadagkoan sa Cebu City Police Office alang sa paglusad na nila sa Oplan Kalag-kalag ug malipayon  siya gumikan kay layo pa lang daan,  giplano na sa kapolisan ang pagbantay sa seguridad sa mga sam-ang aron malikayan ang mga kagubot ugmang adlawa.

Ipangdestino na usab  karong adlawa   ang mga sakop sa  City Traffic Operations Management ilabi na duol sa 23 ka mga sam-ang sa dakbayan ug pipila niini mao ang labing dagko sama sa sam-ang sa Calamba, Pardo, Carreta, Queen City Garden Cemetery ug uban pa.

Aduna pu’y mga fire trucks nga ipahimutang sa gawas sa mga sam-ang. Samtang bisan daghan og idestinong mga polis sa mga sam-ang dili gihapon lugakan ang seguridad sa mga financial institutions sa siyudad. (BANAT NEWS)