Banat ( Leaderboard Top ), pagematch: 1, sectionmatch: 1

Iro ug kabayo mosalmot sa rally

 CEBU, Philippines - Sa tinguha nga mapatik gayud sa huna-huna sa katawhan ang kalabot sa hustong pagpangga ug pag-amuma sa kahayopan, ang Animal Welfare Society mopahigayon og usa ka Fun Walk Rally  agi og pagtamod usab sa selebrasyon sa Animal Welfare Week gikan  sa Oktobre 1-7, 2012.

Ang maong aktibidad maoy labing unang nasudnong lakaw nga ipahigayon dinhi sa syudad sa Sugbo   nga salmotan  sa mga representanteng opisyales sa Animal Welfare  office  nga  maggikan sa 16 ka rehiyon ug usab sa mga interesadong katawhan sa nagkalain-laing dapit.

Sumala pa ni Dr. Berna L. Agriam, Regional Animal Welfare Officer atol sa special Kapihan sa PIA kagahapon didto sa buhatan sa PIA sa Gorordo Avenue, ning  dakbayan  sa Sugbo nga  usa  ka  palahi kining maong aktibidad tungod kay mosalmot  usab niini dili lamang sa katawhan kundi lakip na usab ang ilang mga binuhing  iro ug kabayo nga aduna nay kasinatian sa pakig-socialize  uban sa katawhan.

Gipasabot ni Agriam nga ipaniguro gayud nila nga luwas ang mga katawhan sa maong aktibidad tungod kay kining mga iro nga pagagamiton sa maong lakaw  gitudloan naman sa mismong tag-iya niini kung unsaon pagpakig-tipon  sa mga tawo  ug  ubang  mga  iro  aron dili  sila magbugno sa maong  higayon.

Hinuon matud  pa  niya kinahanglang ipakita usab sa tag-iya ang iyang dakong responsibilidad sa pagdumala sa iyang binuhing iro nga dili gayud kini makapaak.

Gibutyag ni Agriam nga libre ang rehistrasyon alang sa tanang interesadong mosalmot  niining maong aktibidad tungod kay tuyo  nila nga mapatas-an ang pagtan-aw ug kaalam sa katawhan kalabot sa pag-atiman sa ilang kahayopan.

Gitug-an ni Agriam nga sa maong aktibidad ang mga mosalmot magdala og mga streamer, plakard ug ang uban mahimong  mosinggit  usab sa ilang slogan agi  og pagpakita sa ilang pagmahal sa mga hayop.

Ang opening salvo magsugod karong umaabot Septembre 30 ning tuiga  diin ang tanang moapil sa maong aktibidad adto mag-abot sa Fuente Osmeña sa syudad sa Sugbo sa alas 2:00 ang takna sa hapon ug ang lakaw  magsugod sa alas 4:00 ang takna sa hapon padulong ngadto sa Plaza Independencia  diin  usab ipahigayon ang ilang programa.

Gipanghinaot sa Animal Welfare Society nga unta mosalmot gayud ang publiko niining maong aktibidad agi og pagpakita sa ilang pagbarog sa ilang katungdanan ngadto sa kahayopan. Ang Animal Welfare Week saulogon gikan sa Oktubre 1 hangtod Oktubre 7 matag tuig. (BANAT NEWS)

 
  • Follow Us: