Pugante sa CPDRC napusilan sa polis

CEBU, Philippines -  Usa ka pugante kinsa misuway og ilog sa armas de fuego sa polis nga midakop kaniya napusilan sa paa didto sa barangay Tagnocan, lungsod sa Borbon sa miaging Domingo sa hapon. Si PO2 Roy Hortelano sa kapolisan sa Borbon miila sa biktima nga si Edizon Cabahug, hingkod ug lumad nga taga Tagnocan.

 Matud pa ni PO2 Hortelano sa iyang asoy   sa Banat News nga si Cabahug mieskapo sa Cebu Provincial Detention and Rehabilitation Center (CPDRC) sa miaging bulan human motambong sa husay sa iyang kaso nga may labot sa illegal drugs ug illegal possession of firearm.

Apan niadtong Domingo nasigpatan kini sa iyang mga silingan nga namukot unya mitipon sa mga  tawo nga naligo sa dagat.

Dihadiha may mipahibawo sa mga polis sa Borbon kalabot sa presensya sa maong pugante hinungdan nga miresponde dayon ang mga kapolisan.

Apan milangoy kini ngadto sa lawom hinungdan nga migamit og pumpboat  ang kapolisan sa paggukod kaniya.

Dihang naapsan kini gikarga siya   sa pumpboat, apan kalit nga gisuwayan og labni niini ang service firearm ni PO2 Almida nga iyang gitakin sa hawak.

 Sa ilang pag-inilogay mibuto ang armas ug didto motaroy sa paa sa pugante ang bala niini.

 Ang mga tigpaniid nagkanayon   nganong wala uloha pag-igo ang maong pugante.

 Hinuon gihatud dayon siya sa kapolisan ngadto sa Don Dosado Memorial Hospital sa lungsod sa Sogod.

 Human matambali ang samad, gibalhug dayon kini sa prisohan sa kapolisan sa Borbon ug gipaabot nga kuhaon kini sa taga CPDRC. (WC)  - BANAT NEWS