Donasyon sa dugo gipaabot sa DOH

CEBU, Philippines - Gitakda nga makigtagbo si Mayor Michael Rama sa mga kadagkoan sa Department of Engineering and Public Works, City Traffic Operations Management, ingon man usab nila ni City Administrator Jose Marie Poblete ug sa head sa City Legal Office nga si Atty. Joseph Bernaldez aron hisgutan ang bahin sa kalangay sa trabaho sa pagpalapad sa dalan M. Velez.

Gituyo kini ni Rama aron kahatagan siya og katin-awan unsay hinungdan niining tanan.

Sumala pa sa mayor nga nagpadayon ang problema sa trapiko sa maong dalan ilabi na panahon sa rush hour busa iyang panghinaut nga mapaspasan ang pagtrabaho niini.

Samtang sa iyang pag-inspection sa maong dalan sa imaging adlaw nasuta sa mayor nga aduna pa’y mga balay nga wala pa gub-a sa tag-iya sa maong lugar ug usa kini sa gidudahan nga hinungdan sa kalangan sa trabaho.

Hinuon ang ubang bahin sa maong karsada padayon nga gitrabaho kay gihawanan naman sa  mga kabalayan.

Kini sa dihang human makadawat og bayad ang mga tag-iya miboluntaryo kini pagguba sa ilang balay agi og pagsanong sa awhag sa kagamhanan pagpapahawa kanila sa maong lugar tungod sa widening project nga gitrabaho sa DPWH.

Sa sayo pa mikabat sa   78 ka mga balay ang gitakdang gub-on   sa maong lugar tungod sa pagpatuman   sa road widening project.

Samtang may nahibilin pang wala maguba, giuna una karon sa kontraktor ang pagtrabaho sa mga riprap sa mga tampi nga bahin niini.

Pipila na ka higayon nga mihangyo ang mga residente sa maong dapit ug gani miingon sila nga manghawa na sila human sa pasko niadtong December, 2011, apan wala sila modayon.

Unya mihangyo sila nga human na sa Sinulog sila mohawa, apan wala gihapon modayon.

Karon miingon sila nga human    sa pagbukas sa klase, wala gihapon modayon.

Adunay uban nga di gyud gustong mohawa bisan nakadawat na og bayad gikan sa gobiyerno tungod kay giganahan sila sa maong lugar ug gusto nilang pakamatyan nila ang ilang gipuy-an basta dili gyud sila mohawa.

Ang Department of Public Works and Highways migahin og P28 million alang sa pagpalapad sa nahisgutan nga mga dalan   nga mosumpay sa Barangay Guadalupe ug Capitol Site. (BANAT NEWS)