DOH handa na sa smoking ban
MANILA, Philippines - Handa na ang Department of Health (DOH) sa implementasyon ng Executive Order No. 26 o Nationwide Smoking Ban bukas, Hulyo 23.
Kahapon ay nagsagawa ng promotion campaign ang DOH sa Andres Bonifacio Elementary School, San Lazaro Hospital, SM San Lazaro at Jollibee sa Tayuman, Maynila at nagkabit ng mga ‘No Smoking’ posters at nagpaalala sa publiko kaugnay sa smoking ban.
Muling pinaalalahanan ni Health Assistant Sec. Eric Tayag ang publiko na wala nang magaganap na adjustment period, at ganap nang ipatutupad ang smoking ban kung saan maaaring magmulta ang mga mahuhuling lalabag ng P500 hanggang P10,000 o pagkakakulong, at pagkasuspinde ng license to operate para sa mga pasaway na establisimyento.
Inaasahan umano ng DOH na marami ang titigil na sa paninigarilyo gaya noong 2012, kung saan nasa 1 milyong Pilipino ang naitala ng ahensya na tumigil sa paninigarilyo matapos patawan ng mas mataas na buwis ang mga tobacco products.
Samantala, mahigit isang milyon na umano ang nabawas sa bilang ng mga naninigarilyo sa bansa mula 2009 hanggang 2015.
- Latest