Guardo suspenso 3 ka buwan

CEBU, Philippines - Gipatuman sa Department of Interior and Local Government (DILG)-7 ang 3 ka buwan nga suspension batok kang Cebu City Councilor Jerry Guardo subay sa kasong simple neglect of duty dihang kapitan pa kini sa Barangay Sambag 1.

Kahinumduman nga mipagawas og desisyon ang Office of the Ombudsman kalabot sa maong kaso diin nakalatid nga guilty si Guardo sa nahisgutang kaso ug mag-atubang kini og tulo ka buwan nga suspension.

Apan matud pa tungod kay ang kaso nahitabo man dihang kapitan pa si Guardo ang Ombudsman miingon nga mobayad og penalty ang konsehal diin kun pila’y sweldo niini dihang kapitan pa siya, kini maoy iyang bayran.

Giduso sa Ombudsman ang desisyon sa DILG apan ang maong ahensiya mipagawas og memorandum nga ipatuman ang suspension sa konsehal. Nunot niini, si Guardo miingon nga nadawat niya ang kamanduan sa DILG-7 nga pabakantehan ang iyang posisyon niadtong adlaw’ng Biyernes ug pag Lunes misang-at siya og motion for reconsideration and clarification kay gusto niya’g katin-awan kun nganong managlahi ang desisyon sa duha ka ahensiya.

Subay niini, gipasabot ni Atty. Rene Burdeos, Regional Director sa DILG-7 nga ang desisyon sa Ombudsman mao ang “suspension from service” ug kay anaa pa sa serbisyo si Guardo maong ma-implementar ang suspension. Midugang kini nga kun ang konsehal dili na unta konektado sa gobiyerno, dili na kini suspensohon ug pabayron na lang. (BANAT NEWS)