2 pinabulagta sa bus
NORTH COTABATO, Philippines - Bumulagta ang inspector ng Mindanao Star Bus at bodyguard nito makaraang ratratin ng dalawang hindi kilalang lalaki sa loob mismo ng sasakyan na bumabagtas sa kahabaan ng highway sa Purok 7, Barangay Villarica sa bayan ng Midsayap, North Cotabato kahapon ng hapon.
Nakilala ang dalawa na sina Ademar Mangansakan Pangato, 33, may asawa, inspector/supervisor ng Mindanao Star Bus; at Wahid Pangato, 19, binata, pamangking bodyguard na si Ademar at kapwa nakatira sa Barangay Noling sa bayan ng Sultan Kudarat, Maguindanao.
Sa ulat na nakarating kay P/Senior Insp. Realan Mamon, deputy chief of police sa bayan ng Midsayap, magkasama ang mga biktima sa Mindanao Star Bus patungong Davao City mula sa Cotabato City.
Gayunman, nilapitan at pinagbabaril ng dalawang gunmen ang mga biktima pagsapit sa bahagi ng Purok 7 sa Brgy. Villarica.
Mabilis na tumakas ang gunmen lulan ng dalawang motorsiklo na naghihintay sa gilid ng highway.
Wala namang nasugatan sa mga sakay ng bus subalit nagdulot ito ng matinding takot kung saan may mga pasahero pa ang tumakbo at nagsisigaw.
Isa ang clan war sa mga sinisilip na anggulo ng pulisya.
- Latest