Ex-kagawad utas sa sariling baril
MANILA, Philippines - Inaalam ngayon ng pulisya kung aksidente o sinadya ang pagkamatay ng isang dating barangay kagawad makaraang matagpuan ang bangkay nito na may tama ng bala buhat sa sarili niyang baril, Linggo ng gabi sa Caloocan City.
Nakilala ang nasawi na si Romel Del Prado, 45, ng Dagat-Dagatan, Brgy. 14, ng naturang lungsod.
Sa inisyal na ulat ng Caloocan City Police, naganap ang insidente dakong alas-10:15 ng gabi sa ikalawang palapag ng bahay ng biktima. Ayon sa saksing si Cindy Del Prado, 33, kapatid ng nasawi, nanonood siya ng telebisyon sa unang palapag ng kanilang bahay kasama ang mga pamangkin nang marinig ang isang putok ng baril buhat sa kuwarto ng kanyang kuya sa ikalawang palapag ng bahay.
Nang kanyang puntahan, dito tumambad ang wala ng malay na si Del Prado habang umaagos ang dugo buhat sa dibdib.
Sa pagsusuri ng mga imbestigador, naisuko sa kanila ang isang calibre .38 na baril na may lima pang live na bala at isang napaputok na cartridge.
Patuloy ang imbestigasyon ng pulisya upang mabatid ang tunay na dahilan ng pagkasawi ni Del Prado.
- Latest
