Sakyanan sa CCPO walay gi-recall

CEBU, Philippines - Giawhag ni Konsehal Dave Tumulak ang Police Advisory Council (PAC) nga makigtagbo sa Cebu City Police Office aron maklaro ang pangutana bahin sa mga sakyanan ug armas nga giingong gipang-recall.

Kini ang tubag ni Tumulak, deputy mayor for police matters, sa resolusyon ni Konsehal Joel Garganera, chairman sa PAC, nga nangayo og status report sa logistics ug financial support sa siyudad ngadto sa kapolisan.

Base sa record sa General Services Office (GSO), ang siyudad nihatag og 103 ka sakyanan ug motorsiklo sa CCPO.

Nitagana ang siyudad og 18,000 litros nga gasolina matag buwan diin moabot sa kapin sa P5 milyones ang gahin sulod sa usa ka tuig.

Si Tumulak nakapangutana kung nganong magkuwang og suporta ang siyudad sa kapolisan nga 103 man ka sakyanan ang gipagamit ug gani 11 lang ang gikan sa national headquarters sa kapolisan.

Ang konsehal nisugyot nga mas maayo nga makig-estorya si Garganera sa Department of Interior and Local Government sanglit ang kapolisan ubos man sa maong ahensiya.

Giklaro ni Tumulak nga wala’y recall order sa mga sakyanan ug nakapangutana kini kung unsa nga recall ang gipasabot ni Garganera. (BANAT NEWS)