Wanted sa Mabinay, nasikop sa Alegria

CEBU, Philippines - Nasikop dinhi sa Sugbo ang giilang most wanted drug personality sa Lalawigan sa Negros Oriental samtang lima ka tawo nga nalambigit sa ilegal nga drugas ang nadakpan diin ang duha niini mga babaye.

Nadakpan sa Alegria Police Station ug Mabinay Police Station sa Negros Oriental ang giingong drug pusher sa Mabinay, Negros Oriental nga si Andie Elentoriodela Peña niadtong Martes sa gabii kinsa kasamtangang nagpuyo sa Brgy. Madridejos sa Lungsod sa Alegria, habagatang Sugbo.

Matud ni PO3 Lenard Francis Cabahug nga mga usa ka buwan nang gimonitor si Peña human sila makadawat og tip. Nasayran nga mga tulo ka tuig nang nagpuyo sa dapit ang dinakpan.

Nasikop sab sa mga tinugyanan sa Philippine Drugs Enforcement Agency-7 pinaagi sa buy-bust operation silang Weven Bughaw, Ronald Ouano, ug Roland Borres sa Sitio Dita, Brgy. Pulangbato, Siyudad sa Sugbo niadtong Martes sa gabii.

Nakuhaan ang tulo og 24 ka gagmay’ng pakete ug usa ka dakong putos sa gituohang shabu nga nagkantidad og P23 mil. Nakuha sab ang P800 nga kwarta  ug P200 nga buy-bust money. Samtang naaktuhang nanuyop silang Estelia Orcullo ug Jennifer Velez sa may A. Lopez, Brgy Labangon, diin nakuhaan sila’g ebidensya nga mga drug paraphernalia. Raziel Sumayang ug Rhena Pizarra (BANAT NEWS)