Komunidad daku’g papel sa seguridad
CEBU, Philippines - Naglaraw si Bise Gobernador Agnes Magpale nga isugyot atol sa Regional Peace and Order Council (RPOC) meeting nga ipaaktibo ang Barangay Intelligence Network (BIN) sa kabarangayan sa Probinsya sa Sugbo, ilabina sa mga barangay nga anaa sa baybayon.
Ang maong plano ni Magpale, nunot sa hulga sa presensya sa Abu Sayyaf nga motungtong sa lalawigan.
Ang bise gobernador nagkanayon nga gawas sa pagpaaktibo sa BIN, angay usab bansayon ang mga opisyal sa barangay mahitungod sa mga sayop nga impormasyon.
Nunot niini, subling giawhag ni Magpale ang katawhan nga kun adunay makit-ang kadudahang mga tawo sa ilang lugar, dili dayon magpataka og pahibalo ug panabi.
Kinahanglan nga isumbong kini sa awtoridad ug sutaon kini aron dili makamugna og kaguliyang sa publiko.
Kini usab ang giawhag ni House Speaker Pantaleon Alvarez kinsa mibisita sa Sugbo niadtong Lunes nga kinahanglan gyud motabang ang komunidad sa pagsugpo sa terorismo pinaagi sa pagtaho kun adunay makit-ang kadudahang mga tawo sa ilang lugar.
Ang RPOC meeting, ipahigayon karong Mayo 3 uban ang mga gobernador sa rehiyon, uban ang kapolisan ug military. Usa sa ilang hisgotan unya ang nahitabong engkwentro ug presensya sa Abu Sayyaf sa Lalawigan sa Bohol. Le Phyllis F. Antojado ug Mitchelle L. Palaubsanon (BANAT NEWS)
- Latest