LTRP kinahanglan sa LTFRB franchise
CEBU, Philippines - Dili supak ang mga bus operators sa Sugbo nga ang local government units mohimo sa Local Transport Route Plan isip requirements nga malibkas ang moratorium sa franchise.
Matud ni Julieto Flores, tigpamaba sa mga bus operators, nga nanghinaut lang sila nga dili sagulan og pamolitika ang paghimo sa LTRP.
Andam na ang Land Transportation Franchising and Regulatory Board sa paglibkas sa 18-anyos na nga franchise issuance moratorium basta ang LGU makaduso sa ilang LTRP.
Apan matud pa ni LTFRB Chairman Martin Delgra nga ang maong LTRP ila pa kining tan-awon kung nagsunod ba kini sa transport modernization program sa Department of Transportation.
Matud ni Delgra nga angayan nga ang LGU gyud ang magbuot sa klase sa transportasyon nga idugang sa ilang lugar ingon man kung asa ang rota niini.
Human matan-aw sa LTFRB ang LTRP sa usa ka LGU anha pa nila ilibkas ang franchise moratorium issuance sa maong lugar.
Dugang ni Flores nga okay ra nila nga ang LGU ang mohimo sa LTRP basta ang mga bag-o nga franchise adto i-offer sa mga existing operators.
"Dili nila ihatag sa new operators para walay samok," matud ni Flores. (BANAT NEWS)
- Latest
