Kris wala mopatim-aw

CEBU, Philippines – Giimbitar apan wala nitungha ang Queen of All Media nga si Kris Aquino atol sa bunyag sa kamaguwangang anak sa ex-husband niini nga si James Yap ug sa asawa niining si Michela Cazzola nga si Michael James Yap o Baby MJ. Gitugutan hinuon ni Kris nga mutambong  ang anak niining si  Bimby ug si Joshua. Gipahigayon ang bunyag didto sa Sanctuario de San Antonio sa Forbes Park, Makati City niadtong Sabado.

Wrong na!

Daling niusab sa iyang Instagram post ang pambato sa British Virgin Islands nga si Erika Creque human kini nasayop ug nagtuo nga si President Rodrigo Duterte kadtong iyahang gikauban sa hulagway nga gi-share sa social media. Gikurehian ang kandidata sa mga Filipino fans nga si Chavit Singson ang  iyang gikauban ug dili si Duterte. "Was an honor meeting the President of the Philippines Mr Rodrigo Duterte! One love from the British Virgin Islands!" sigun pa niya.

Museum in Dolphy

Gipahibalo ni Epy Quizon nga gisugdan na ang konstruksyon sa  Dolphy Museum didto sa residential resort sa Batangas. Gitawag niyang Dolphyville ang maong museum diin adto ibutang ang mga memorabilia sa nipanaw na niya nga  amahan nga si Comedy King Dolphy.

Phoebe nabalaka

Gibati og kabalaka ang Metro Manila Film Festival 2016 Best Supporting actress ug Viva Artist nga si Phoebe Walker nunot sa nude scene niya sa pelikulang Seklusyon. Nasayran nga  ipasalida puhon ang  Director's cut nga version niini. Ipakita ra hinuon ang maong version didto lang sa laing nasud ug wala’y labot  dinhi sa Pilipinas. Nanghinaut siya nga dili mokatap dinhi sa nasud ang maong eksena.

Jake dili una

Gisalikway una sa hunk actor nga si Jake Cuenca ang posibilidad nga makauyab siya karong tuiga ug  gusto niya nga ma-busy ang iyang kaugalingon sa pag-apil og triathlon. Kahinumdoman nga  nagbuwag na sila si Jake ug ang  American model nga si Sara Grace Kelley. "That's not even in the table right now," tsika pa niini ngadto sa pep.ph.

Best in hangyo

Tataw nga wala nahisguti ang lovelife ni Karla Estrada atol sa pagpasalida sa iyang life story sa Maalaala Mo Kaya niadtong Sabado sa gabii. Giangkon ni Karla nga gihangyo niya ang chief operating officer of broadcast sa ABS-CBN nga si Cory Vidanes nga dili ipalakip ang iyang love story ilabi na ang napakyas nila nga  relasyon kaniadto ni  Rommel Padilla.

Max andam na

Gibutyag sa aktres nga si Max Collins nga andam na siya makigminyo ngadto sa iyang uyab nga si Pancho Magno. Sigun pa sa aktres nga gipangandaman na nila ni Pancho ang maong butang. "We're just really preparing for that, but that's the goal,"saysay pa sa aktres.

Wedding singer ni Camille

Mapasalamtaon ang Kapuso actress nga si Camille Prats ngadto sa Kapamilya singer/composer nga si Ogie Alcasid sa pagtuman sa saad niini nga mamahimong 'wedding singer' atol sa ilang kasal nila ni VJ Yambao niadtong Sabado. Giawit ni Ogie ang kaugalingon nga iconic song niini nga "Pangarap Ko Ay Ibigin Ka," samtang nipaso si Camille padulong sa altar.

Hugyaw ka Sam!

Hugyaw ang transformation sa "Your face sounds familiar" contestant nga si Sam Shoaf diin gisunod niya si Alicia Keys ug niawit sa birit song niini nga "If I Ain't Got You." Gidayeg siya sa judge nga si Gary Valenciano tungod sa talagsaon nga performance niini. "First time mong ginagawa ito. I think it was very convincing. You were a lookalike, you were a move-alike, yung sound-alike that's forgivable because you're a guy and bata pa, " sigun pa ni Gary.

Midaog gihapon

Nadepensaan ni Eva Castillo ang iyahang titulo isip daily winner sa "Tawag ng Tanghalan" sa programang  It's Showtime niadtong Sabado diin gikanta niya ang "Kaibigan" ni Anthony Castelo. Nasayran nga niapil  si  Eva sa maong kompetisyon sa pamasin nga makatigom og salapi aron ipatambal ang  iyang sakit nga kidney tumor.